Werder Bremen ka suspenduar ish-mesfushorin e Liverpool, Naby Keita deri në fund të sezonit dhe gjithashtu e ka gjobitur lojtarin pasi ai refuzoi të luante për ta në humbjen e tyre ndaj Bayer Leverkusen.
Pasi mësoi se nuk do të ishte në formacionin fillestar, Keita refuzoi të vinte në stadium me ekipin dhe vendosi të shkonte në shtëpi.
“Werder Bremen e ka suspenduar Naby Keïta-n deri në fund të sezonit. Klubi gjithashtu i ka dhënë mesfushorit një gjobë të konsiderueshme,” thuhet në deklaratën e klubit.
“28-vjeçari nuk do të stërvitet më me skuadrën dhe as nuk do të jetë pjesë e ekipit të parë”.
Clemens Fritz, kreu i Werder Bremen tha: “Si klub, ne nuk do ta tolerojmë sjelljen e Naby. Ai e zhgënjeu skuadrën e tij në një kohë vështirësie dhe vendosi interesat e tij mbi ato të ekipit.
“Ne nuk mund ta lejojmë këtë. Në këtë fazë të sezonit, ne kemi nevojë për fokus të plotë në ndeshjet e mbetura dhe një ekip që qëndron së bashku”, përfundoi ai.