Sot është ditë me shumë derbi lokal në futboll.
E nisim nga qyteti i Gjilanit, ku sot zhvillohet ndeshja mes Dritës dhe Gjilanit.
Fatkeqësisht ndeshja duhet të zhvillohet në Prishtinë, në stadiumin “Fadil Vokrri” pasi ende nuk është gati stadiumi i qytetit të Gjilanit. Kjo ndeshje luhet nga ora 15:00 dhe si gjithmonë prodhon spektakël si në fushë poashtu edhe në tribuna.
Nga Gjilani, shkojmë në Londër. Atje do të luhet derbi i zjarrtë mes Arsenalit dhe Tottenhamit.
Dy ekipet londineze me rivalitet shumë vjeçar kërkojnë 3 pikë. Arsenali kërkon fitoren e tretë radhazi në Premier Ligë këtë sezon, kurse Spurs kërkon të rikthehet tek fitorja pas dy humbjeve. Ndeshja luhet në ora 17:30 në “Emirates Stadium”.
Nga Londra në Romë. Në ora 18:00 do të luhet derbi mes Lazios dhe Romës. Derbi i kryeqytetit italian gjithmonë tërheq vëmendje.
Lazio i Vedat Muriqit kërkon të rikthehet te fitorja pas 3 ndeshjeve, ku pati 2 barazime dhe 1 humbje.
Kurse, në anën tjetër, Roma kërkon të vazhdojë me formën e mirë që kanë krijuar në fillim të këtij sezoni.
Ndeshja zhvillohet në stadiumin “Stadio Olimpico”./Indeksonline/