Pa fitues ka përfunduar ndeshja miqësore mes Zvicrës dhe Kosovës e zhvilluar në Cyrih në prezenc të një numri të madh të tifozëve.
Zvicra dhe Kosova barazuan 1:1 pas 90 minutave lojë në stadiumin “Letzigrund” në qytetin e Cyrihut.
Pas disa rasteve dhe një dominimi të lehtë të “helvetikëve”, pjesa e parë u mbyll pa gola 0-0.
Shtatë minuta pasi nisi pjesë e dytë, Milot Rashica e zhbllokoi rezultatin duke i dhënë avantazhin “Dardanëve” në minutën e 52-të nga afërsia. Festa në stadium ishte e madhe, ngase prezent ishin një numër shumë i madh i tifozëve shqiptarë.
Festa e të përzgjedhurve të Giresses zgjati vetëm nëntë minuta. Lotomba barazoi shifrat në minutën e 61-të, duke shfrytëzuar një gabim të portierit, Aro Muriq.
Në këtë përballje nga minuta e parë luajtën dyshja shqiptare, Granit Xhaka dhe Xherdan Shaqiri.
Disa minuta kishte edhe futbollisti tjetër me prejardhje nga Kosova, Andi Zeqiri që hyri në pjesën e dytë, ndërsa inkuadrimi i tij u përcjell me vërshëllima nga tifozët për shkak të vendimit të tij për të përfaqësuar Zvicrën dhe jo Kosovën.
Kjo ishte ndeshja e dytë miqësore e Kosovës në muajin mars, ndërsa ka regjistruar fitore 5:0 ndaj Burkina Fasos pesë ditë më parë në stadiumin “Fadil Vokrri” në Prishtinë.
Këto dy ndeshje njëherit ishin të parat e Kosovës nën ‘epokën’ e trajnerit të ri, Alain Giresses.