Mesfushori i Manchester Unitedit, Fred, ka insistuar se skuadra e tij do të tentojë ta fitojë titullin e Ligës së Kampionëve sezonin e ardhshëm, kualifikimin ku synojnë ta sigurojnë këtë fundjavë në ndeshjen kundër Leicester Cityt.
Manchester Unitedi për momentin radhitet në pozitën e tretë në tabelën e Premierligës falë goldallimit më të mirë sesa Chelsea, ndërsa me një pikë më shumë se Leicesteri, që radhitet në pozitën e pestë, transmeton GE.
Djemtë e Ole Gunnar Solskjaer do ta kenë të garantuar një vend në edicionin e ardhshëm të Ligës së Kampionëve me të paktën një barazim në ndeshjen e së dielës kundër Leicester Cityt.
Megjithatë, nëse Leicesteri e fiton këtë ndeshje si vendas dhe Chelsea e mposht Wolvesin në Stamford Bridge, atëherë Djajtë e Kuq do të binin nga top katërshja e Anglisë – skenar ky të cilin Fred as që dëshiron ta mendojë.
“Si klub, ne duam të jemi në Ligën e Kampionëve çdo vit pasi që jemi një klub tejet i madh”, ka thënë Fred, në intervistën e dhënë për faqen zyrtare të klubit.
“Kështu që është shumë e rëndësishme për ne si lojtarë të kthehemi në Ligën e Kampionëve. Kjo ka rëndësi të madhe edhe për klubin”.
“E meritojmë edhe ne lojtarët e edhe klubi pjesëmarrjen në Ligën e Kampionëve. Do të jetë e mrekullueshme të kthehemi aty sezonin e ardhshëm dhe ne do të tentojmë ta fitojmë”.