Skuadra e Barcelonës përveç se humbi titullin në La Liga, humbi sot edhe takimin ndaj Osasunas.
Barça u mposht në Camp Nou nga Osasuna me rezultatin 1:2 dhe Messi nuk është aspak i lumtur me këtë paraqitje të skuadrës.
Madje, Messi thotë se skuadra nuk luajti mirë që nga rikthimi i futbollit, duke lëshuar shumë pikë nga ndeshja në ndeshje.
“Ne nuk donim ta përfundonim sezonin kështu, por kjo përfaqëson se si ka kaluar sezoni. Ne ishim një ekip shumë i çrregullt, shumë i dobët, me intensitet të ulët… Ne humbëm shumë pikë dhe loja e sotme është një përmbledhje e sezonit”, tha fillimisht Messi.
“Ndjesitë janë që skuadra përpiqet por nuk mundet, ne lëmë shumë për të dëshiruar në shumë ndeshje”.
“Gjithçka që kemi përjetuar që nga janari ka qenë shumë e keqe. Ne duhet të ndryshojmë shumë gjëra me të vërtetë.”
“Tifozëve po u mbaron durimi – sepse nuk po u japim asgjë. Kjo është normale”, përfundoi ai.
Vlen të theksohet se Real Madridi u shpall kampion i La Ligas pas fitores 2:1 ndaj Villarrealit.Ky është titulli i 34’të i Real Madridit i fituar në La Liga.