Shtëpia e futbollit evropian, UEFA, ka bërë një hap të ri strategjik drejt afrimit me rajonin e Evropës Juglindore dhe Azisë së Vogël, duke hapur zyrën e saj të re në Stamboll. Ky veprim simbolizon përkushtimin e vazhdueshëm të UEFA-s për të qenë më afër anëtarëve të saj dhe për të avancuar zhvillimin e futbollit në çdo cep të kontinentit. Në këtë ngjarje të rëndësishme morën pjesë liderët e federatave evropiane të futbollit, përfshirë edhe presidentin e Federatës së Futbollit të Kosovës, Agim Ademi.
Ademi e cilësoi hapjen e zyrës së re si një sinjal të qartë të vendosmërisë së UEFA-s për të mbështetur të gjitha federatat anëtare në rrugëtimin e tyre drejt përparimit dhe profesionalizimit.
“Është kënaqësi e veçantë të jem në mesin e liderëve të federatave evropiane, me të cilët ndajmë vizionin e përbashkët për zhvillim afatgjatë dhe të qëndrueshëm të futbollit. UEFA edhe një herë dëshmoi se është e përkushtuar dhe e vendosur të mbështesë të gjitha federatat në rrugëtimin e tyre për zhvillim dhe përparim” shkroi Ademi në Facebook.
Kjo zyrë e re e UEFA-s pritet të shërbejë si një pikë strategjike për mbështetje teknike, koordinim dhe bashkëpunim më të ngushtë me federatat e rajonit, duke e forcuar edhe më shumë rolin e UEFA-s si një institucion gjithëpërfshirës dhe partner i fuqishëm i zhvillimit të futbollit.
