Albin Tahiri ka garuar fundjavën që shkoi në garën e Federatës Ndërkombëtare të Skitarisë (FIS), e cila po mbahet në Soriska Planina të Sllovenisë.
Skitari kosovar pati paraqitje të kënaqshme, pasi arriti ta përfundojë garën dhe ta zë vendin e 20-të në disiplinën e sllallomit.
Ai përfundoi dy lëshimet me kohë 1 minutë, 58 sekonda e 85 të qindtat.
Në total ishin 58 garues, 33 prej të cilëve nuk arritën ta përfundojnë njërën nga dy lëshimet, shkaku i kushteve të vështira që mbretëronin.
Me këtë pozitë Tahiri fitoi pikë Olimpike dhe kreu misionin e dytë me sukses, ndërsa për të fituar normën Olimpike në këtë disiplinë (sllallom) i duhen edhe tri rezultate të tilla deri në fund të ciklit kualifikues për Lojërat Olimpike Dimërore Pekin 2022.
Albini nuk ishte i kënaqur me paraqitjen, pasi thotë se ka mundur të bëjë edhe më mirë.
“Moti dhe kushtet e shtegut ishin më të këqija se sa dje. Kishte edhe mjegull dhe shi. Shumë garues nuk e përfunduan garën. Unë dola i 20-ti me numër 45, por nuk jam i kënaqur me pikët e fituara nga FIS-I, edhe pse janë të mira për normën Olimpike”, tha Tahiri për Komitetin Olimpik të Kosovës.
Një ditë më parë, ai e zuri pozitën e 17-të nga 65 garues në total, shumica e të cilëve nuk e përfunduan garën.