Një njoftim i ri për tifozët është postuar në faqen zyrtare të Federatës së Futbollit të Rumanisë dhe është theksuar se çfarë rrezikon kjo kombëtare, në rast të incidenteve gjatë ndeshjes me Kosovën. FRF ka shpjeguar me detaje pasojat që do të bien mbi “trikolorët”, nëse tifozët krijojnë probleme në tribuna, ashtu siç ndodhi në duelin e parë që ishte zhvilluar në Bukuresht. Më pas, rumunët shfaqën flamuj dhe pankarta skandaloze nacionaliste, të cilat nuk kaluan pa u dënuar nga UEFA. Sipas njoftimit, sjelljet e tilla të përsëritura mund të ndikojnë që Rumania ta humbasë përballjen me Kosovën në tavolinë, çka do të thoshte se “trikolorët” do të humbnin edhe vendin e parë në grupin e Ligës së Kombeve.