Manchester United ka shënuar fitore me rezultat të thellë 4-0 në shtëpi ndaj Evertonit në kuadër të javës së 13-të në elitën e futbollit anglez.
Amad Diallo pati një rast të mirë shënimi në minutën e 14-të, por gjuajtja e tij ishte e pasaktë duke përfunduar jashtë portës.
Golin e avantazhit Unitedi e gjeti në minutën e 34-të përmes Marcus Rashford i cili shënoi për 1-0 pas asistimit të Bruno Fernandes.
Pak minuta pa përfunduar pjesa e parë, ‘Djajtë e Kuq’ e shënuan edhe golin e dytë, kësaj radhe përmes Joshua Zirkzees (41’) i cili shënoi për 2-0 ku sërish Bruno Fernandes ishte në rolin e asistuesit.
Në pjesën e dytë Unitedi shënoi edhe dy gola të tjerë, ku sërish protagonistë ishin dyshja Zirkzee dhe Rashford.
Rashford (46’) me të filluar pjesa e dytë arriti që të shënojë golin e tij të dytë personal në këtë takim për t’i çuar shifrat në 3-0.
Për epilogun përfundimtar të takimit u përkujdes Joshua Zirkzee i cili në minutën e 64-të shënoi për 4-0 pas asistimit të Amad Diallos.
Kjo ishte fitorja e parë në Ligën Premier për Ruben Amorim pas barazimit ndaj Ipswich Town dhe fitorja e tij e dytë si trajner i Unitedit, pas asaj ndaj Bodo Glimt.