Trajneri i Manchester United, Ralf Rangnick, ka thënë se Harry Maguire do të mbetet kapiten i skuadrës.
Së fundmi mediat angleze kanë raportuar se Rangnick i ka dhënë një detyrë Cristiano Ronaldos, që 37-vjeçari të bëhet shembull për të rinjtë e skuadrës.
Kjo ka bërë që mediat angleze të raportojnë rreth një situate jo të mirë të krijuar në “Old Trafford”, pasi këshillën e trajnerit për Ronaldon që të bëhet shembull për lojtarët e rinj e kanë parë si një paralajmërim që shiriti i kapitenit të kalojë te portugezi, ndonëse Maguire e mbanë atë qe më shumë se dy vjet.
Spekulimet u shtuan edhe më shumë pas raportimeve se reprezentuesi anglez nuk po mundet që të tregohet lider brenda fushës dhe në zhveshtore pasi autoriteti i tij duket të ketë pësuar rënie që prej kthimit të Ronaldos në Manchester United nga Juventusi.
Krejt kjo situatë është krijuar në një kohë kur “Djajtë e Kuq” nuk po kalojnë nëpër rezultate të dëshiruara.
Megjithatë, shefi i shtabit teknik i Manchester Unitedtit ka mohuar një gjë të tillë dhe raportimet i ka quajtur si të pavërteta.
“Është absolutisht e pakuptimtë. Unë asnjëherë nuk kam biseduar me lojtarët për shiritin e kapitenit. Nuk ka qenë kurrë një problem për mua. Harry është kapiteni ynë dhe do të mbetet kapiteni ynë”, ka deklaruar gjermani.
“Nuk jam aspak i frustruar sepse e di që nuk është e vërtetë. Jam i fokusuar në përgatitjen e ekipit”, ka deklaruar mes tjerash 63-vjeçari.
Ndryshe, Harry Maguire është kapiten i Manchester Unitedit nga koha e Ole Gunnar Solskjaer.