Lionel Messi ka reaguar për herë të parë pasi shorti i Ligës së Kampionëve e vendosi PSG-në përballë Real Madridit.
Paris Saint-Germaini dhe Real Madridi do të përballen mesvete në kuadër të fazës së 1/8 së finales në Ligën e Kampionëve.
Messi duke folur për Marca, tha se për skuadrën e tij qëllimi është ta fitojnë trofeun e çmuar të Ligës së Kampionëve.
“Qëllimi i PSG-së është Liga e Kampionëve. Është qëllimi i të gjithëve. Është një kompeticion i veçantë për të gjitha skuadrat e mëdha”, tha Messi.
Shtatë herë fituesi i Topit të Artë foli edhe për kohën që po kalon te skuadra e PSG-së që nga transferimi në verë të këtij viti.
“Ishte një ndryshim shumë i madh, sepse ne kemi jetuar në të njëjtin vend për një kohë të gjatë, nuk ishte e lehtë. Por tani jemi shumë mirë në një qytet spektakolar, duke luajtur për një nga ekipet më të mira në botë. Jemi shumë të lumtur”.