Kombëtarja e Kosovës ka arritur suksesin më të madh në historinë e vet të futbollit, duke siguruar fazën e play-off-it në Kupën e Botës 2026, shkruan Rekordi.net.
Kualifikimi në fazën e play-off-it vjen si rezultat i një procesi të gjatë transformimi dhe konsolidimi, ku një nga figurat kyçe të kësaj rritjeje mbetet presidenti i Federatës së Futbollit të Kosovës, Agim Ademi.
Gjatë viteve të udhëheqjes së tij, futbolli kosovar është shndërruar nga një projekt i ri ndërkombëtar në një histori të qëndrueshme suksesi.
Investimet në infrastrukturë, profesionalizimi i ekipeve të të gjitha niveleve dhe përkushtimi për standarde evropiane kanë krijuar themelet e një kombëtare konkurruese, e cila tashmë renditet mes pjesëmarrësve të elitës botërore.
Analistët e sportit vlerësojnë se politika e qëndrueshme e Ademit për të integruar talentët brenda dhe jashtë vendit ka qenë kyçe për formimin e një grupi të balancuar, të motivuar dhe me identitet të fortë.
Udhëheqja e tij ka mundësuar që Kosova të hyjë në një erë ku planet afatgjata janë kthyer në rezultate konkrete.
Kualifikimi në play-off-in e Botërorit 2026 nuk është vetëm një arritje sportive, por edhe një dëshmi e kapaciteteve menaxheriale brenda FFK-së.
Agim Ademi konsiderohet gjerësisht si “arkitekti i ngritjes së madhe të Dardanëve”, duke i dhënë vendit një sukses historik që pritet të ndikojë pozitivisht në zhvillimin e futbollit kosovar për vite me radhë.
Kosova tani hyn në skenën më të madhe të futbollit botëror, e gatshme të përfaqësojë vendin me dinjitet dhe ambicie – një rrugëtim që mban vulën e punës së tij të pandalshme dhe vizionare.