Kanë përfunduar tri ndeshjet e sotme në kuadër të javës së 23-të në Superligën e Kosovës në futboll.
Befasi e madhe ishte pa dyshim disfata e Dritës nga Fushë Kosova.
Ndeshja e zhvilluar në stadiumin “Sami Kelmendi” në Lipjan u mbyll me rezultatin 1:0 për Fushë Kosovën.
Gjilanasit patën disa mundësi të arta shënimi, duke përfshirë edhe penalltinë në minutën e 70-të, por portieri i Fushë Kosovës, Davide Borsellini pati një paraqitje spektakolare.
Goli i fitores erdhi në minutën e 88-të i shënuar nga Sinanovic.
Me këtë fitore, Fushë Kosova shkon në 15 pikë në vendin e parafundit, kurse Drita mbetet e treta me 43 pikë, pesë larg lideri, Ballkani.
E fitore sot shënuan dy ekipet e kreut, Ballkani dhe Llapi.
Kampioni në fuqi triumfoi 1:2 në udhëtim ndaj Dukagjinit.
Pas 25 sekondave lojë, Meriton Korenica shënoi për 0:1 njërin nga golat më të shpejtë në histori të Superligës.
Për 0:2 u përkujdes Nazmi Gripshi që shënoi nga penalltia në minutën e 27-të.
Klinasit ngushtuan epërsinë në minutën e 88-të kur shënoi Rugova, por nuk arritën të nxirrnin të paktën një pikë.
Kjo fitore e dërgon Ballkanin në kuotën e 48 pikëve në vendin e parë, një më shumë se Llapi.
Në anën tjetër, Dukagjini mbetet i gjashti me 30 pikë, një më pak se Prishtina që luan nesër me Lirinë.
Fitoren sot e shijoi edhe Llapi që mposhti në “Rexhep Rexhepi” në Drenas Feronikelin 74 me rezultat 0:1.
Goli i vetëm dhe i fitores për llapjanët erdhi në minutën e 69-të kur realizoi Muhamet Hyseni.
Tani, Llapi ka 47 pikë në vendin e dytë, një më pak se Ballkani.
Kurse, Feronikeli 74 mbetet përkohësisht në vendin e shtatë me 23 pikë të grumbulluara.