Presidenti i Federatës së Futbollit të Kosovës e ka cilësuar ndeshjen e parë zyrtare të Kosovës në ombrellën e FIFA-së kundër Haitit si pikën kur nisi historia e re e futbollit të Kosovës.
Ai ka thënë se gjatë këtyre nëntë viteve futbolli i Kosovës ka ecur shumë përpara dhe ka arritur në një nivel të lartë në skenën ndërkombëtare.
Ai më tutje ka shkruar se synimi i tanishëm i Kombëtares së Kosovës është kualifikimi në Kampionatit Evropian të viti të ardhshëm.
Postimi i plotë i Agim Ademi në “Facebook”:
Sot e 9 vjet më parë Kosova e zhvilloi ndeshjen e parë miqësore ndërkombëtare nën ombrellën e FIFA-s kundër Haitit, në stadiumin “Adem Jashari” në Mitrovicë. Edhe pse ishte vetëm një ndeshje miqësore, ajo ishte shumë e rëndësishme për të treguar se futbolli ynë ishte gati të bëhej pjesë e federatave ndërkombëtare të futbollit, UEFA e FIFA.
Kjo ndeshje miqësore shënoi fillimin e një historie të re për futbollin tonë, dhe ishte një sinjal i qartë për motivin e lojtarëve dhe tifozëve tanë se asgjë nuk është e pamundur nëse punojmë fort dhe besojmë në veten tonë.
Në këto 9 vite, futbolli i Kosovës ka ecur shumë përpara dhe ka arritur në një nivel të lartë në skenën ndërkombëtare. Futbollistët dhe të gjithë ata që janë pjesë e futbollit tonë kanë treguar një vullnet të fortë dhe një këmbëngulje të padiskutueshme për të arritur qëllimet e tyre.
Tani, objektivi ynë kryesor është kualifikimi në Euro 2024. Kjo do të jetë një sfidë e madhe, por ne jemi të vendosur dhe të përkushtuar për të arritur sukses në këtë fushatë kualifikuese.
Le të vazhdojmë të ndjekim ëndrrën tonë dhe të punojmë fort për ta bërë atë realitet, duke kujtuar të kaluarën përplot vështirësi e sakrificë.
Me përkushtimin dhe punën tonë të palodhshme, të gjitha ëndrrat mund të bëhen realitet.
Faleminderit për mbështetjen tuaj të vazhdueshme!