E ardhmja e Conor Gallagher vazhdon të jetë e paqartë nëse do të mbetet te Chelsea apo do të largohet gjatë afatit kalimtar të janarit.
Mesfushori anglez është në listën e dëshirave të Tottenham Hotspur, derisa te Chelsea ende nuk kanë vendosur nëse do ta mbajnë atë apo do ta largojnë.
Trajneri i Chelseat, Mauricio Pochettino ka folur për të ardhmen e anglezit, duke thënë se i takon vet Gallagherit të vendos nëse do të qëndrojë te Chelsea apo do të largohet.
“Shiko, nuk mund të garantoj se do të jem këtu pas nesër. Në futboll, gjërat mund të ndodhin dhe është mes klubit dhe lojtarit. Vetëm lojtari mund të garantojë ose klubi”.
“I takon Gallagherit më shumë se klubit sepse ai ka ende një vit e gjysmë të mbetur në kontratën e tij. Ai mund të qëndrojë. Ai mund të thotë ‘po unë do të jem këtu sepse kontrata ime më lejon të jem këtu’, dhe pastaj klubi duhet të marrë një vendim, apo jo? Bëhet fjalë për marrjen e vendimit më të mirë për klubin dhe lojtarit”.
“Sigurisht, si të gjithë lojtarët në klube të ndryshme, kur arrini në këtë pikë është gjithmonë koha për të folur dhe për të marrë një vendim për të ardhmen. Kjo do të jetë mes klubit dhe lojtarit”.
“Por në këtë moment nuk ka asgjë për të zyrtarizuar, asgjë për të thënë. Klubi është i lumtur me të, ai është i lumtur këtu”, deklaroi Pochettino.
Kontrata aktuale e Gallagher me Chelseat skadon në verën e vitit 2025, derisa lajmet e fundit në Ishull thonë se Chelsea do ta nxjerr në shitje atë.
23-vjeçari këtë edicion ka qenë një nga më të mirët te Chelsea, ku ka zhvilluar 23 ndeshje mes kampionatit dhe Kupës dhe ka bërë katër asistime.