Një gjobë rekord është vendosur ndaj klubit Koln, që e ka pësuar për shkak të spektaklit piroteknik të ultrasve në derbin me M’Gladbach. I luajtur në datën 22 tetor, dhe i fituar 3-1 nga Koln.
Tifozët vendas dhuruan “show” përpara nisjes së derbit të zjarrtë. Për disa minuta stadiumi dhe fusha u mbuluan nga tymueset, flakadanët dhe mjetet e tjera piroteknike.
Fillimi i ndeshjes u shty për disa minuta për shkak të tymit të madh, teksa veprimi i ultrasve të Kolnit nuk u prit aspak mirë nga autoritetet gjermane.
Pas rreth 2 muajsh nga derbi, Komiteti i Kontrollit në Federatën Gjermane të Futbollit (DFB) ka gjobitur Koln për përdorimin e fishekzjarrëve me 595 mijë euro!
Kurrë më parë një klub profesionist gjerman nuk ka marrë një gjobë kaq të lartë për probleme të shkaktuara nga tifozët e tij. Nga kjo shumë, 198,000 euro do të investohen në masat e sigurisë apo parandalimit të dhunës.
“Përdorimi i mjeteve piroteknike është pjesë e futbollit dhe kulturës së tifozëve. Nuk ka nevojë të kalohet asnjë vijë e kuqe. Konkretisht, siguria e spektatorëve duhet të garantohet gjithmonë.
Dhe nuk duhet të ketë pasoja në zhvillimin e ngjarjeve sportive. Këto kufij u tejkaluan qartë kundër Gladbach. Kjo rezulton edhe në dëme të mëdha financiare.
Një gjobë kaq e madhe na godet shumë rëndë në rrugën tonë drejt rimëkëmbjes sa më të shpejtë ekonomike”, lexohet në komunikatën e klubit të Bundesligës.