Mediumi rumun “Gsp.ro” ka treguar se si Federata e Futbollit e Rumanisë (FRF) ka arritur të mbrohet dhe të marrë dënim të lehtë nga UEFA pas skandalit në ndeshjen ndaj Kosovës në kuadër të kualifikimeve për Euro 2024.
Komisioni Disiplinor i UEFA-s e ka shpallur vendimin pas incidenteve në ndeshjen Rumani-Kosovë, e cila përfundoi 2-0, por u ndërpre për 52 minuta nga gjyqtari francez Willy Delajod për shkak të mesazhit në tribuna dhe thirrjeve “Kosova është Serbi”.
UEFA ka dënuar Federatën e Futbollit të Rumanisë me një gjobë prej 52 mijë eurosh dhe në ndeshjen e ardhshme do të luajnë pa tifozë, përveç fëmijëve nën 14 vjeç, të organizuar në grupe dhe të shoqëruar nga një i rritur për 10 të mitur.
Gazeta rumune “Gsp.ro” zbuloi se si FRF e ndërtoi mbrojtjen e saj dhe pse dënimi i marrë nuk është aq drastik.
Sipas tyre, departamenti juridik i FRF-së e bazoi mbrojtjen e tij në argumentin se mesazhet nuk ishin raciste apo ksenofobike, por një mesazh politik. Duke qenë se edhe shteti rumun është ndër ata që nuk e njeh pavarësinë e Kosovës.
Një tjetër pikë e mbrojtjes së UEFA ishte edhe fakti që pas rifillimit të lojës nuk pati më incidente.
Rumania kështu u përpoq të zvogëlojë “dëmtimin” e krijuar në këtë sezon nga grupi i tyre i tifozëve, i cili shkaktoi incidente të të njëjtit lloj edhe në ndeshjen e zhvilluar në Prishtinë./abcnews