Trajneri i Kosovës, Bernard Challandes, e ka pranuar se nuk do të mundë të llogarisë në disa futbollistë në ndeshjen e dytë të Ligës së Kombeve, kundër Greqisë, të dielën në Prishtinë, për shkak të rregullave të koronavirusit për karantinim.
Kosova do ta nisë edicionin e dytë në Ligën e Kombeve më 3 shtator kundër Moldavisë në Parma të Italisë, para se ta presë Greqinë në Fadil Vokrri tri ditë më vonë.
Duke folur të hënën në një konferencë për media në Prishtinë, ku edhe e nënshkroi vazhdimin e kontratës për edhe dy vjet me Federatën e Futbollit të Kosovës, Challandes u ankua se do ta ketë shumë të vështirë ta përgatisë një ekip të vetëm për këtu dy ndeshje.
Zvicra, ku luajnë shumë futbollistë të dardanëve, është ndër shtetet që detyron karantinimin për cdo person që kthehet nga Kosova në këtë shtet.
Për këto ndeshje, përveç Milot Rashicës që po raportohet se nuk është lejuar nga Werder Bremen që të vijë të luajë për Kosovën, ka disa ditë që Gazeta Express ka raportuar edhe për Benjamin Kololli, Hekuran Kryeziu dhe Idriz Voca, që gjithashtu mund të mungojnë, pasi kur të kthehen, janë të detyruar të futen në karantinë për dy javë.
“Nuk dua të flas me emrat të veçantë, por ata do të jenë për ndeshjen me Moldavinë dhe do të mundë të kthehen në shtetet e tyre ka pasur nevojë të futen në karantinë, ndërsa ne me pjesën tjetër të ekipit do të kthehemi në Prishtinë për ndeshjen me Greqinë”, tha Challandes.
“Është e vështirë të mundesh vetëm për futbollin në këtë kohë, por duhet të përshtatemi”, shtoi ai.
“Nuk është e lehtë ta kem një ekip të komponuar sepse kemi lojtar që sapo i kanë nisur përgatitjet, kemi lojtarë që janë në pritje të ndërrimit të skuadrës, kemi lojtarë që nuk kanë luajtur që prej përfundimit të kampionatit dhe nuk kanë stërvitur, kështu që është periudhë e vështirë për të gjetur ekip ideal për ndeshjet e shtatorit”, nënvizoi ai. /GE/