Gjatë karrierës së tij Cristiano Ronaldo ka fituar tituj pa fund, qofshin këto në nivel klubi, kombëtareje apo personalë, ndërsa nuk i kanë munguar as rekordet që do të mbeten gjatë në botën e futbollit.
Prej verës së vitit 2018 portugezi është pjesë e Juventusit dhe, edhe me klubin bardhezi ka si objektiv të vendosë dy rekorde të tjera që mund të hyjnë në historinë e sportit më popullor në botë.
Kështu pasi është shpallur golashënuesi më i mirë në kampionatin anglez me Manchester United dhe në atë spanjoll me Realin e Madridit, Ronaldo mund të bëhet i pari futbollist në botë që fiton titullin e golashënuesit më të mirë në tri kampionate, nëse ia del të renditet në krye edhe në kampionatin italian me Juven.
Natyrisht që gjërat këtë sezon nuk janë vetëm në dorën e yllit portugez, pasi kur kanë mbetur edhe 8 javë për t’u luajtur deri në fund të kampionatit, sulmuesi i Lazios Ciro Immobile kryeson me 4 gola më tepër në renditjen e golashënuesve.
Një tjetër rekord që synon Ronaldo, është të fitojë Ligën e Kampionëve për herë të 6 në karrierë, si asnjë futbollist tjetër më parë, pasi e ka fituar garën më të rëndësishme evropian një herë me Manchester Unitedin dhe 4 herë me Real Madridin.
Edhe këtu rruga nuk është aspak e lehtë, pasi fillimisht do të duhet të përmbysin humbjen në ndeshjen e parë ndaj Lyonit dhe më pas të vijojnë me fazën e çerekfinaleve e në vijim, për të shpresuar të fitojnë Ligën e Kampionëve.